Hermann, Jacob an Scheuchzer, Johann Jakob (1707.01.26)
|
|
|
|
| Kurzinformationen zum Brief mehr ... | |
|---|---|
| Autor | Hermann, Jacob, 1678-1733 |
| Empfänger | Scheuchzer, Johann Jakob, 1672-1733 |
| Ort | Basel |
| Datum | 1707.01.26 |
| Briefwechsel | Hermann, Jacob (1678-1733) |
| Signatur | ZB Zürich. SIGN: Ms H 318, pp.317-318 |
| Fussnote | Beigebunden ist ein Papierstreifen mit Grüssen H's an den Bruder von J.J. Scheuchzer und der Ankündigung, am nächsten Samstag dessen Brief zu beantwortem |
Vir Celeberrime, Amice honoratissime.
En remitto Tibi delineationem tuam Barometri portatilis pro cujus communicatione gratias persolvo maximas, similem machinam mihi fabricari curabo, ut eas quas dixi instituere queam observationes in montium vicinorum cacuminibus aeque ac prope radices eorundem. Verum est Mariotum in supputatione sua Altitudinis atmosphaerae non attendisse ad varias anomalias in constitutione aeris, quae impediant quominus certa et constante ratione crescant densitates in ordine ad varias a Tellure altitudines. Hae irregularitates pendent omnino a variis caloris et frigoris gradibus in aere; et haec ipsa accidentia obstant quo minus variis mercurialis columnae diminutionibus certae a tellure altitudines respondeant. Huic malo forsan occurrere liceret adhibendo insimul thermometrum pro aeris constitutione, tempore observationis, exploranda, cujus cum barometro comparatione, aliquid in praxi profuturi elici posset; non parum etiam ad id facere videntur quae habet Amontonius in Actis Paris. 1704 pag. 164 sqq. Veruntamen quia hoc argumentum nondum ea qua par est attentione examinare mihi licuit judicium meum adhucdum suspendere cogor. Ex tabula logarithmorum quoque supputabo numquid hypothesis vulgo recepta, quod densitates aeris sint ut pondera incumbentia respondeat cum Calculo Cassiniano, in quo miror Cl. illum Virum taxasse Mariottum loco progressionis geometricae arithmeticam assumentem et tamen laudare Maraldi observationes et ratiocinia in Actis 1703 ubi Maraldus ipse progressionem arithmeticam assumsit.
Qua de Actis Trivoltiensibus in postremis meis dixeram, hausi ex Ephemerid. Erudit. Paris. ubi haec habentur verba pag. 608, 1704 "On voit dans les Leçons d'Optique de M. Barrow une resolution Geometrique de l'Arc en Ciel interieur en particulier; on trouve aussi par rapport à cet Arc-en-Ciel une solution differente de celle de M. Barrow, dans les Memoires de Trevoux de 1702." Forsan est error citationis in Ephemeride gallicana si nihil, ut dicis citato in loco invenitur quod ad materiam Iridis spectet. Si tamen iis actis trivoltiensibus per septimanam commode carere posses me Tibi multum ejusdem anni 1702 communicatione obstringeres. Hisce Vale et amare perge Celeberrimi Nominis Tui deditissimum[1] Hermannum.
Basileae 26.to Ianuarii 1707
Clariss. Dn. Fratrem millies, rogo, a me salutes, proximoque die Sabbathi ad illius literas exoptatissimas respondebo.[2]
Fussnoten
Zurück zur gesamten Korrespondenz