Hermann, Jacob an Scheuchzer, Johann Jakob (1711.07.25)
|
|
| Kurzinformationen zum Brief mehr ... | |
|---|---|
| Autor | Hermann, Jacob, 1678-1733 |
| Empfänger | Scheuchzer, Johann Jakob, 1672-1733 |
| Ort | Padova |
| Datum | 1711.07.25 |
| Briefwechsel | Hermann, Jacob (1678-1733) |
| Signatur | ZB Zürich. SIGN: Ms H 318, pp.395-396 |
| Fussnote | |
Vir Celeberrime, Amice pl. Colende.
Hisce diebus appulit apud nos nobiliss. Hirzelius, mihique fasciculum a Te sibi creditum attulit continentem physicam tuam nuper editam in Compendium redactam;[1] unde pro hoc compendio non minus quam pro ipso physicae corpore[2] a Clariss. Fratre Tuo mihi allato,[3] et exemplaribus Orationis tuae inauguralis[4] mihi inscriptae gratias ago ingentes. Utinam et ego vicissim ex meis lucubrationibus aliquid redhostimenti loco offerre possim! Sed quod differtur non auferetur. Saltem omnibus modis adnitar, ut proxime opusculum meum circa fluida corpora[5] prelo subdatur, in quo perpoliendo atque ordinando etiamnunc occupatus teneor. Tu interim de solidioribus scientiis non parum benemeritus es, quod Physicae tuae elegantiora Newtoni placita[6] et aliorum inserere allaborasti quod a nemine adhuc quod sciam factum est. In ea mei quoque licet laude illa quam mihi tribuisti, indigni mentionem facere dignatus es, cum explicationem meam fontium intermittentium illustrasti, unde etiam et hoc nomine me Tibi obstrictum profiteor. Dn. Hirzelii conatus quantum potero juvare conor,[7] deque diligentia ejus et ingenio in Mathematicis non pauca mihi polliceor. Vallisnerius noster cum tota familia feriis hisce aestivis patriam petiit; interim nihil novi adhuc circa primam Cathedram ad quam Ipse adspirat accidit,[8] quanquam non dubitem fore ut tandem ipsi decernatur, quod mihi dupliciter gratum erit si contigerit; primum quod mihi amicissimus sit, deinde quod Cl. Fratri tuo aperta erit janua ad Lycaeum nostrum.[9] Plura addere temporis angustia vetat; Hisce Vale Amice optime et amare non desine Tuum Hermannum
25 Iulii 1711 Ipso Iacobi die quam Tibi faustam et felicem apprecor cum pluribus sequuturis.
Zurück zur gesamten Korrespondenz