Bernoulli, Johann I an Scheuchzer, Johann Jakob (1714.05.15)
|
|
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Scheuchzer, Johann Jakob, 1672-1733 |
| Ort | Basel |
| Datum | 1714.05.15 |
| Briefwechsel | Bernoulli, Johann I (1667-1748) |
| Signatur | ZB Zürich. SIGN: Ms. H 318, pp.61-62 |
| Fussnote | |
Viro Celeberrimo et Eruditissimo
Joh. Jacobo Scheuchzero
S. P. D.
Johannes Bernoullius
En hic summulam XVII Florenorum Cl. Fratri Tuo tradendam pro transmisso panno quem heri accepi sartum tectum et qui mihi sicuti optabam bonae notae videtur:[1] Rogo ut juxta salutem meis verbis dicendam etiam gratias agas Cl. Fratri pro praestito mihi officio. Misi per Filium meum Conrectori Paravicino[2] epistolam Tuam[3] ad ipsum exaratam et ad me directam. Ad risum ne an ad commiserationem magis me commoverit Historiola Tua de Theologorum vestrorum oestro dicere non possum; miseret quidem me Tui sub cruce etiamnum ingemiscentis, sed hoc ipso monstrant quam acerbe inimicos Tuos ferierit honorifica Tui promotio, ut ideo non sine causa laetari possim ego Tu vero Triumphum agere. Fateor mehercle contumeliosa ejusmodi verba a Theologo illo eructata difficilioris fuisse concoctionis et ad quae digerenda vix chalybeus sufficiat stomachus, qualis certe mihi non esset; nescio quippe annon talia verba verberibus retorsissem, si vel maxime excommunicationis poenam incurrissem. Bone Deus! sunt ne hi Christi Discipuli, qui ob Tuam prosperitatem rumpuntur fere, atque lucidis adeo oculis aspiciunt quod tandem super Te sidus benignum exortum fuerit. Pudeat hos viros livorem suum nimis patefacientes: Quis enim haec sine scandalo intelliget ut non simul exclamet o fictas hominum mentes! eorum qui tantopere inculcant et ebuccinant charitatem, quando ipsi nil nisi aeruginem teterrimam sub pectore fovent: Interim rumpantur ut ilia Codro,[4] Tu recte faciendo neminem timeas atque demandatam provinciam ringente invidia felicissime obeas in Famae Tuae incrementum et communium nostrorum studiorum propagationem et decus. Vale Vir Amicissime atque mihi favere perge.
Dabam Basileae a. d. XV. Maij 1714.
Fussnoten
- ↑ Im Brief von 1714.05.09 hatte Johann Bernoulli über Johann Jakob Scheuchzer bei Wilhelm Schinz, dem Schwager von Scheuchzers Bruder Johannes, ein Stück schwarzen Krepons oder Krepps bestellt.
- ↑ Vincentio Paravicini (1648-1726) war seit 1683 Konrektor des Basler Gymnasiums.
- ↑ Von der Korrespondenz mit Vincentio Paravicini sind in der ZB Zürich 37 Briefe von und 123 Briefe an Scheuchzer erhalten.
- ↑ Vergil, Ekloge 7, 26.
Zurück zur gesamten Korrespondenz