Scheuchzer, Johannes an Bernoulli, Johann I (1709.09.08)
|
|
| Kurzinformationen zum Brief mehr ... | |
|---|---|
| Autor | Scheuchzer, Johannes, 1684-1738 |
| Empfänger | Bernoulli, Johann I, 1667-1748 |
| Ort | Zürich |
| Datum | 1709.09.08 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 668, Nr. 35* |
| Fussnote | |
Vir Celeberrime, Excellentissime
Fautor Honoratissime.
En Secunda Vice inito conatu me reducem; Vix dum proficiscebar d. 20. Mensis noviter Elapsi serenitate tranquilla, noctu subsequente ingruebant tonitrua, nimbi, fulgura, et quicquid coelum minitabundi habet, prosperis an invitis fatis nescio, Thermas usque fabarias[1] cum socijs meis, naturae studiosis quibusdam perveni, et montium culmina alta nive canescebant, circa caput bonae Spei nos detineri sine Successu videbamus, quapropter receptui canere consultum duximus, vixdum Valenstadium[2] regrediebamur, conspirant venti, consurgunt atrae nubes, prorumpunt de novo nimbi nivosi, proximus oppido Lacus ventis exagitatus spumescit, efferatur, in fluctus insolitos attollitur, imo et hic per quinque dies nostrum reditum moratur; quicquid sit Trunco nostro[3] per hyemem proximam Athleticum auguror Vale, foveoque ut sub alta nive feliciter adhuc perennet usquedum in futurae aestatis tempus forsitan laetius.
Reditus mei nova Tibi do per Latores duos juvenes ingenuos, discendi apprime cupidos Politices studiosos, qui Rei Helveticae praeprimis Historicae et Helveticae ergo claram inclytam Basileam Vestram et aliquot alias Helvetiae urbes lustrare cupiunt, iccirco animi gratia ad Vos proficiscuntur, Exporrector Literarum ipse est Scheuchzerus[4] optimi ingenij juvenis, meus in principijs Mathematicis noviter discipulus sane diligentissimus, ex beatissimi nunc Patris mei[5] D.o Fratre Rei Armamentariae Praefecto[6] filius dignissimus: alter est Gosweilerus, cujus indolem noveris ex ipsismet quae de cognato meo dixi, excepto quod mea nunquam usus sit institutionis opera; Si quam ipsis in videndis Basileae notabilibus conferre manum, sive auxilium poteris, id ipsum mihi praestabis, nedum eorundem D. D. parentes quammaxime obstringes.
D.us Eglingerus[7] ad nos misit fasciculum plantarum, Parisijs ipsi a D.no Jussieu Medico Lugdunensi traditum, nullus dubito quin res suae feliciter Basileam attigerint, quapropter et Te nunc rogo ut Libros Parisijs pro me et Amicis accersitos, per proximum Tabellarium mihi transmittas. Hisce autem Vale et Amare perge Celeberrimi Excellentissimi Nominis Tui Cultorem devotum Johannem Scheuchzerum M. D.rem
Raptim Tiguri. d. 8. 7bris 1709.
Fussnoten
- ↑ Bad Pfäfers.
- ↑ Walenstadt.
- ↑ Siehe die Anmerkung im Brief von 1709.06.23.
- ↑ Johann Jakob Scheuchzer (1690-1751).
- ↑ Hans Jakob Scheuchzer (1645-1688).
- ↑ Johannes Scheuchzer (1647-1740), Seidenfabrikant und Zeugherr in Zürich.
- ↑ Christoph Eglinger (1686-1733).
Zurück zur gesamten Korrespondenz