Bernoulli, Johann I an Poleni, Giovanni (1730.12.26)
[Noch keine Bilder verfügbar]
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Poleni, Giovanni, 1683-1761 |
| Ort | Basel |
| Datum | 1730.12.26 |
| Briefwechsel | Bernoulli, Johann I (1667-1748) |
| Signatur | Venedig, Biblioteca Marciana. SIGN: ms. It. 284 ( = 6576), Nr.8 |
| Fussnote | Auf der Adresseite: "Avec un Paquet I.P." Die Basler Abschrift trägt das Datum "Dabam Basileae a. d. VIII. Kal. Jan. 1731" |
Illustrissimo ac Celeberrimo Viro
Johanni Poleno
Mathematico acutissimo
S. P. D.
Joannes Bernoulli
Juxta gratissimas litteras Tuas, XV Kal. Decemb. exaratas accepi quoque summulam illam sex florenorum, quos diu ante erogaveram in subscriptionem pro Lexico Moreriano; poteras eadem opera, si ita voluisses, sex alios adhuc florenos persolvi curare, qui proxime exsolvi debent Bibliopolae, quando nempe traditurus est tria priora Volumina istius Lexici; tradentur autem, ut audio, jam ante finem mensis februarii, aut brevi post. Statim ac recepero illa volumina, compingi curabo in fasciculum una cum duabus, quas petis, Dissertationibus, altera filii de Respiratione, altera mea de Orbitis et Apheliis Planetarum.[1] Dixisti, Vir Illustrissime, a Mercatore, qui epistolam Tuam ad me deferendam curabat, significatum iri, cuinam fasciculum librorum tradere potero, ut tuto ad Te deferatur, sed nihil adhuc ab illo mihi significatum est. Quare faxis, quaeso, ut brevi significetur.
Quod attinet ad Opera mathematica Petropoli edita, nescio qui factum, ut memoria me falleret, scribentem eorum pretium esse triginta florenorum; vidi enim postea ex epistola filii in manus recidente, pretium eorum operum esse, non triginta, sed trigintasex florenorum; videbis igitur mihique perscribes, an tanti emere velis. Caeterum vero, quandonam supellex Hermanniana, cum qua ista opera aliique libri mihi destinati sunt missi, huc sit adventatura, id quidem plane ignoro; De ipso Clariss. Hermanno audio, illum etiam nunc haerere Petropoli, et vix fore ut discedat ante exitum Hyemis. Deus O. M. Te servet incolumem per decursum novi Anni multorumque sequentium, largiaturque Tibi omnia quae desideras juste animi et corporis bona.
Dabam Basileae a. d. VII. Kal. Jan. MDCCXXXI.
A Monsieur
Monsieur Poleni tres Celebre
Professeur des Mathematiques, etc.
à Padoue
Fussnoten
- ↑ [Text folgt]
Zurück zur gesamten Korrespondenz