Hermann, Jacob an Scheuchzer, Johann Jakob (1709.08.17)
|
|
| Kurzinformationen zum Brief mehr ... | |
|---|---|
| Autor | Hermann, Jacob, 1678-1733 |
| Empfänger | Scheuchzer, Johann Jakob, 1672-1733 |
| Ort | Padova |
| Datum | 1709.08.17 |
| Briefwechsel | Hermann, Jacob (1678-1733) |
| Signatur | ZB Zürich. SIGN: Ms H 318, pp.377-378 |
| Fussnote | |
Vir Celeberrime.
Feliciter peractum Iter Helveticum Tibi gratulor, atque laetus ex Te intelligo, curas Tuas inter alia etiam versari circa Mappam Helvetiae nostrae adornandam qua opera non minus de Patria bene mereberis ac aliis insignibus Tuis Meditationibus Historiam Naturalem concernentibus de Re literaria hactenus meritus es. Non opus est ut de alio exemplari Itinerum tuorum Alpinorum ad me curando sollicitus sis, quandoquidem Amicissimi nostri Wallisnerii exemplari, quod tetrum illud naufragium equidem evasit sed non sine impressis sibi stigmatibus, uti potero. Nescio an ex Te quaesiverim novas aliquas circa fasciculum quendam Dissertationum Bernoullianarum quem Pater meus jam sub initium Aprilis anni hujus currentis ad Te aut Cl. Fratrem Tuum se dedisse significat ad me ulterius curandum: si quid de eo nosti, quaeso Te, ut haut gravatim indices utinam lateat, nondum enim ad me pervenit. In Novis Tuis litterariis Helvetiae quorum exemplar, licet misere habitum pro quibus et reliquis quae mihi destinares grates refero maximas, pag. 49 inter alia haec lego Lettera a N. N. scritta da Cristoforo Caminata già Professore in Filosofia, e Teologia Predicatore superior locale, e Definitore della Provinzia di Bologna de Minori Osservanti, e Teologo dell'Ill.mo Magistrato di Ravenna; per giustificare la sua sortita della Chiesa Romana. Londra d. 25. Sept. 1707. Cum innuere videaris in summitate paginae, hanc epistolam Genevae prodiisse, gratum esset intelligere num Autorem cognoscas.
Nunc totus occupatus sum in conscribenda Mechanica fluidorum seu Hydraulica, in quo opera omnia in hac maximi momenti Philosophiae naturalis sive Matheseos partis inventa aliaque perspicua et nova methodo demonstrare conabor geometrico more absque algebraicis calculis nisi ubi summa necessitate urgente analiticis expressionibus opus erit, ut ab iis etiam intelligi queat, qui tantum in demonstrationibus linearibus nonnihil studii posuerunt. Cl. Fratrem[1] quem interea iter suum Rhetiae absolvisse[2] puto officiose a me salutabis, cui etiam quae supra de fasciculo Dissertationum[3] ex Te quaesivi indicare poteris si placet. Vale et amare non desine Tuum addictissimum Hermannum Patavii d. 17 Augusti 1709.
Fussnoten
- ↑ Johannes Scheuchzer $BIBB
- ↑ Johannes Scheuchzer teilte am 22. Juni 1709 an Jacob Hermann sein Vorhaben mit, in einigen Tagen einen Ausflug in die Bündner Alpen zu machen. Siehe dazu Hermann an Johann Jakob Scheuchzer von 1709.07.06. Hermann bezieht sich auf einen Bericht Johannes Scheuchzers über diesen Ausflug auch im Brief von 1709.09.07.
- ↑ Die weiter oben erwähnte Publikation von Johann I Bernoulli.
Zurück zur gesamten Korrespondenz