Hermann, Jacob an Scheuchzer, Johann Jakob (1706.08.25)
|
|
| Kurzinformationen zum Brief mehr ... | |
|---|---|
| Autor | Hermann, Jacob, 1678-1733 |
| Empfänger | Scheuchzer, Johann Jakob, 1672-1733 |
| Ort | Basel |
| Datum | 1706.08.25 |
| Briefwechsel | Hermann, Jacob (1678-1733) |
| Signatur | ZB Zürich. SIGN: Ms H 318, pp.283-284 |
| Fussnote | Siegel |
Vir Celeberrime, Amice honoratissime.
Quatuor jam effluxere septimanae ex quo fasciculum duo Exemplaria Ephemeridum naturae Curiosorum complectentem unum pro Te alterum pro Cl. Muralto per Tabellarium ad Te curavi, et cum totius illius temporis decursu literas nullas a Te acceperim metuere nonnihil incipio, aut Te aegrotare aut fasciculum Tibi haud fuisse redditum; anxiusque hujus rei nunc ex Te Vir Celeberr. quaerendum duxi quid mihi circa haec sentiendum sit. Pro Professione Historica vacante specimina partim jam habita sunt et nonnulla adhuc habebuntur a Cl. Cl. Dn. Dn. Staehelino[1] nostro, et Harschero: proximo die lunae Consultiss. Noster Battierius pro Professione Iuridica disputabit, quam Ampliss. Noster Faeschius ad Archigrammatei munus promotus vacuam reliquit, et quantum audio nullos habet Competentes. Nuperrime a Dn. De Moyvre celebri in Anglia Mathematico sed Gallo exule didici Newtoni Librum de Coloribus anglico prius idiomate editum latinitate donatum jam in publicum prodiisse.[2] Ipsum librum anglice conscriptum jam apud Cl. nostrum Bernoullium vidi atque in eo perplura egregia et Autore suo digno contineri non nisi per transennam vidi ejus linguae notitia destitutus. Hisce vale Vir Clarissime et fave Celeberrimi nominis Tui Cultori perpetuo Hermanno
Basileae 25 Augusti 1706.
A Monsieur
Monsieur Jean Jaques
Scheuchzer tres celebre Docteur
en Medecine, et des Societez Imperiale
et Royale d'Angleterre
à Zurich
Fussnoten
Zurück zur gesamten Korrespondenz